ದಿನಪೂರ್ತಿಯ ಒತ್ತಡದ ಜೀವನಶೈಲಿಯಲ್ಲಿ ದೈಹಿಕ ಹಾಗೂ ಮಾನಸಿಕ ಆರೋಗ್ಯವನ್ನು ಕಾಪಾಡಿಕೊಳ್ಳುವುದು ಅತ್ಯಂತ ಅವಶ್ಯಕ. ಅದರಲ್ಲೂ ಹೃದಯದ ಕಾರ್ಯಕ್ಷಮತೆಯನ್ನು ಸುಧಾರಿಸಲು ಮತ್ತು ಒತ್ತಡವನ್ನು ಕಡಿಮೆ ಮಾಡಲು ಯೋಗದಲ್ಲಿ ಹಲವು ಸರಳ ಆಸನಗಳಿವೆ. ಅಂತಹವುಗಳಲ್ಲಿ ‘ಮಕರಾಸನ’ (Crocodile Pose) ಅತ್ಯಂತ ಪ್ರಮುಖವಾದ ಮತ್ತು ಪ್ರಭಾವಿ ವಿಶ್ರಾಂತಿ ಭಂಗಿಯಾಗಿದೆ. ಮಕರ ಎಂದರೆ ಸಂಸ್ಕೃತದಲ್ಲಿ ಮೊಸಳೆ ಎಂದರ್ಥ; ಮೊಸಳೆಯು ನೀರಿನಲ್ಲಿ ಅಥವಾ ನೆಲದ ಮೇಲೆ ಸಂಪೂರ್ಣವಾಗಿ ನಿರಾಳವಾಗಿ ವಿಶ್ರಾಂತಿ ಪಡೆಯುವ ರೀತಿಯನ್ನು ಈ ಆಸನ ಹೋಲುತ್ತದೆ.
ಮಕರಾಸನ ಎಂದರೇನು ಮತ್ತು ಮಾಡುವುದು ಹೇಗೆ?
ಇದು ಬೋರಲಾಗಿ ಮಲಗಿಕೊಂಡು ಮಾಡುವ ಒಂದು ಸರಳವಾದ ರಿಲ್ಯಾಕ್ಸೇಷನ್ ಆಸನವಾಗಿದೆ.
-
ಯೋಗ ಮ್ಯಾಟ್ ಅಥವಾ ನಯವಾದ ನೆಲದ ಮೇಲೆ ಹೊಟ್ಟೆಯ ಮೇಲೆ ಬೋರಲಾಗಿ ಮಲಗಿ.
-
ನಿಮ್ಮ ಕಾಲುಗಳನ್ನು ಸ್ವಲ್ಪ ದೂರಕ್ಕೆ ಚಾಚಿ, ಪಾದಗಳು ಹೊರಮುಖವಾಗಿರುವಂತೆ ನೋಡಿಕೊಳ್ಳಿ.
-
ನಿಮ್ಮ ಮುಂಗೈಗಳನ್ನು ಮಡಚಿ, ಒಂದರ ಮೇಲೆ ಮತ್ತೊಂದನ್ನು ಇಟ್ಟುಕೊಳ್ಳಿ.
-
ನಿಮ್ಮ ಹಣೆಯನ್ನು ಮಡಚಿದ ಕೈಗಳ ಮೇಲೆ ಮೆತ್ತಗೆ ವಿಶ್ರಾಂತವಾಗಿರಿಸಿ.
-
ಕಣ್ಣುಗಳನ್ನು ಮುಚ್ಚಿ, ಸಂಪೂರ್ಣ ದೇಹವನ್ನು ಸಡಿಲ ಬಿಡಿ.
-
ಈ ಸ್ಥಿತಿಯಲ್ಲಿ ಸುಮಾರು ಎರಡು ನಿಮಿಷಗಳ ಕಾಲ ಅಥವಾ ನಿಮ್ಮ ಅನುಕೂಲಕ್ಕೆ ತಕ್ಕಷ್ಟು ಸಮಯ ಆಳವಾದ ನಿಧಾನ ಉಸಿರಾಟವನ್ನು ನಡೆಸಿ.
ಹೃದಯದ ಆರೋಗ್ಯಕ್ಕೆ ಮಕರಾಸನದ ಅದ್ಭುತ ಪ್ರಯೋಜನಗಳು
-
ಹೃದಯದ ಬಡಿತ ನಿಯಂತ್ರಣ: ಮಕರಾಸನ ಮಾಡುವಾಗ ದೇಹ ಮತ್ತು ಮನಸ್ಸು ಸಂಪೂರ್ಣ ವಿಶ್ರಾಂತಿ ಸ್ಥಿತಿಗೆ ಜಾರುತ್ತದೆ. ಇದು ಪ್ಯಾರಾಸಿಂಪಥಟಿಕ್ ನರಮಂಡಲವನ್ನು ಸಕ್ರಿಯಗೊಳಿಸಿ, ಹೃದಯದ ಬಡಿತವನ್ನು ಸಹಜ ಸ್ಥಿತಿಗೆ ತರಲು ಮತ್ತು ರಕ್ತದೊತ್ತಡವನ್ನು ನಿಯಂತ್ರಿಸಲು ನೆರವಾಗುತ್ತದೆ.
-
ಒತ್ತಡ ಮತ್ತು ಆತಂಕ ದೂರ: ದೈನಂದಿನ ಮಾನಸಿಕ ಒತ್ತಡ ಹಾಗೂ ಆತಂಕವು ಹೃದಯದ ಮೇಲೆ ನೇರವಾದ ದುಷ್ಪರಿಣಾಮ ಬೀರುತ್ತದೆ. ಈ ಆಸನವು ಮನಸ್ಸನ್ನು ಶಾಂತಗೊಳಿಸಿ, ಕಾರ್ಮಿಸೋಲ್ ಹಾರ್ಮೋನ್ ಮಟ್ಟವನ್ನು ತಗ್ಗಿಸಿ ಹೃದಯಕ್ಕೆ ಅತ್ಯಂತ ನೆಮ್ಮದಿ ನೀಡುತ್ತದೆ.
-
ಉಸಿರಾಟದ ವ್ಯವಸ್ಥೆಯ ಸುಧಾರಣೆ: ಈ ಭಂಗಿಯಲ್ಲಿ ಮಲಗಿದಾಗ ಡಯಾಫ್ರಮ್ ಮುಕ್ತವಾಗಿ ಚಲಿಸುತ್ತದೆ. ಇದು ಆಮ್ಲಜನಕದ ಸರಬರಾಜನ್ನು ಸುಗಮಗೊಳಿಸಿ ಶ್ವಾಸಕೋಶದ ಸಾಮರ್ಥ್ಯವನ್ನು ಹೆಚ್ಚಿಸುತ್ತದೆ.
-
ದೇಹದ ಗುರುತ್ವಾಕರ್ಷಣೆಯ ನಿವಾರಣೆ: ತೊಡೆಗಳು, ಕಾಲುಗಳು, ಮುಖ, ತಲೆ, ಎದೆ ಮತ್ತು ಹೊಟ್ಟೆಯ ಭಾಗಗಳು ನೇರವಾಗಿ ನೆಲಕ್ಕೆ ತಾಗಿಕೊಂಡಿರುವುದರಿಂದ, ಇಡೀ ದೇಹವು ಗುರುತ್ವಾಕರ್ಷಣೆಯ ಬಲದಿಂದ ಮುಕ್ತವಾಗಿ ದೈಹಿಕ ಬಳಲಿಕೆ ಹಾಗೂ ಸುಸ್ತು ನಿವಾರಣೆಯಾಗುತ್ತದೆ.
-
ದೀರ್ಘಕಾಲದ ಸಮಸ್ಯೆಗಳಿಗೆ ಉಪಶಮನ: ನಿರಂತರ ಅಭ್ಯಾಸದಿಂದ ಕೆಮ್ಮು, ಅಧಿಕ ರಕ್ತದೊತ್ತಡ ಹಾಗೂ ನಿದ್ರಾಹೀನತೆಯಂತಹ ಸಮಸ್ಯೆಗಳು ಕ್ರಮೇಣ ದೂರವಾಗುತ್ತವೆ.
