ಉತ್ತಮ ಆರೋಗ್ಯಕ್ಕೆ ಕೇವಲ ಪೌಷ್ಟಿಕ ಆಹಾರವಷ್ಟೇ ಸಾಲದು, ಸರಿಯಾದ ನಿದ್ದೆಯೂ ಅತ್ಯಗತ್ಯ. ಇತ್ತೀಚಿನ ದಿನಗಳಲ್ಲಿ ಕೆಲಸದ ಒತ್ತಡ, ಮೊಬೈಲ್ ಬಳಕೆ ಹಾಗೂ ಬದಲಾದ ಜೀವನಶೈಲಿಯಿಂದಾಗಿ ಅನೇಕರು ನಿದ್ರಾಹೀನತೆಯಿಂದ ಬಳಲುತ್ತಿದ್ದಾರೆ. ಮನುಷ್ಯನಿಗೆ ನಿದ್ದೆ ಕಡಿಮೆಯಾದರೆ ದೈಹಿಕ ಹಾಗೂ ಮಾನಸಿಕವಾಗಿ ಅನೇಕ ಆರೋಗ್ಯ ಸಮಸ್ಯೆಗಳು ಎದುರಾಗುತ್ತವೆ. ಹಾಗಾದರೆ, ದಿನಕ್ಕೆ ಎಷ್ಟು ಗಂಟೆ ಮಲಗಬೇಕು?
ಒಬ್ಬ ಮನುಷ್ಯ ದಿನಕ್ಕೆ ಎಷ್ಟು ಗಂಟೆ ನಿದ್ದೆ ಮಾಡಬೇಕು ಎಂಬುದು ಆತನ ವಯಸ್ಸಿನ ಮೇಲೆ ಆಧಾರಿತವಾಗಿರುತ್ತದೆ. ಈ ಕುರಿತು ಪ್ರಸಿದ್ಧ ‘ನ್ಯಾಷನಲ್ ಸ್ಲೀಪ್ ಫೌಂಡೇಶನ್’ (National Sleep Foundation) ಪ್ರಮುಖ ವರದಿಯೊಂದನ್ನು ಬಿಡುಗಡೆ ಮಾಡಿದ್ದು, ವಯಸ್ಸಿಗೆ ಅನುಗುಣವಾಗಿ ಎಷ್ಟು ಗಂಟೆಗಳ ನಿದ್ರೆ ಅಗತ್ಯ ಎಂಬುದನ್ನು ಸ್ಪಷ್ಟಪಡಿಸಿದೆ.
ವಯೋಮಾನಕ್ಕೆ ತಕ್ಕಂತೆ ನಿದ್ರೆಯ ಅವಧಿ ಇಲ್ಲಿದೆ ನೋಡಿ:
- ನವಜಾತ ಶಿಶುಗಳು: ಹುಟ್ಟಿದ ಮಗುವಿಗೆ ನಿದ್ದೆಯೇ ಪ್ರಧಾನ. ಈ ಮಕ್ಕಳು ದಿನಕ್ಕೆ ಕನಿಷ್ಠ 14 ರಿಂದ 17 ಗಂಟೆಗಳ ಕಾಲ ಮಲಗಬೇಕು.
- 4 ರಿಂದ 11 ತಿಂಗಳ ಮಕ್ಕಳು: ಸ್ವಲ್ಪ ಬೆಳೆಯುತ್ತಿರುವ ಈ ಹಸುಗೂಸುಗಳಿಗೆ ದಿನದಲ್ಲಿ 12 ರಿಂದ 15 ಗಂಟೆಗಳ ಕಾಲ ನಿದ್ರೆ ಅವಶ್ಯಕ.
- 1 ರಿಂದ 2 ವರ್ಷದ ಮಕ್ಕಳು: ಈ ವಯಸ್ಸಿನ ಮಕ್ಕಳಿಗೆ ದೈಹಿಕ ಬೆಳವಣಿಗೆ ಹೆಚ್ಚಿರುವುದರಿಂದ 11 ರಿಂದ 14 ಗಂಟೆ ನಿದ್ದೆ ಬೇಕಾಗುತ್ತದೆ.
- 3 ರಿಂದ 5 ವರ್ಷದ ಮಕ್ಕಳು: ಶಾಲೆಗೆ ಹೋಗಲು ಸಿದ್ಧರಾಗುವ ಈ ವಯಸ್ಸಿನ ಮಕ್ಕಳು 10 ರಿಂದ 13 ಗಂಟೆ ಮಲಗುವುದು ಆರೋಗ್ಯ ದೃಷ್ಟಿಯಿಂದ ಉತ್ತಮ.
- 6 ರಿಂದ 13 ವರ್ಷದ ಮಕ್ಕಳು: ಶಾಲಾ ದಿನಗಳಲ್ಲಿ ಓದು, ಆಟ ಎಂದು ದಣಿಯುವ ಈ ಮಕ್ಕಳಿಗೆ 9 ರಿಂದ 11 ಗಂಟೆಗಳ ಕಾಲ ನಿದ್ರೆ ಬೇಕು.
- ವಯಸ್ಕರು (26 ರಿಂದ 64 ವರ್ಷ): ಕೆಲಸದ ಜವಾಬ್ದಾರಿ, ಸಂಸಾರದ ಒತ್ತಡದಲ್ಲಿರುವ ಯುವಕರು ಹಾಗೂ ಮಧ್ಯವಯಸ್ಕರು ಕಡ್ಡಾಯವಾಗಿ ದಿನಕ್ಕೆ 7 ರಿಂದ 9 ಗಂಟೆಗಳ ಕಾಲ ನಿದ್ದೆ ಮಾಡಲೇಬೇಕು.
- ಹಿರಿಯ ನಾಗರಿಕರು (65 ವರ್ಷ ಮೇಲ್ಪಟ್ಟವರು): ವಯಸ್ಸಾದಂತೆ ನಿದ್ದೆ ಕಡಿಮೆಯಾಗುತ್ತದೆ. ಆದರೂ ಆರೋಗ್ಯವನ್ನು ಕಾಪಾಡಿಕೊಳ್ಳಲು ಪ್ರತಿದಿನ 7 ರಿಂದ 8 ಗಂಟೆಗಳ ಕಾಲ ನಿದ್ದೆ ಮಾಡುವುದು ಅತ್ಯಗತ್ಯ.
ನಿದ್ದೆ ಕಡಿಮೆಯಾದರೆ ಏನಾಗುತ್ತದೆ?
ನಿರಂತರವಾಗಿ ನಿದ್ದೆ ಕೆಡುವುದರಿಂದ ಅಥವಾ ಸರಿಯಾಗಿ ಮಲಗದೇ ಇರುವುದರಿಂದ ಬೊಜ್ಜು, ರಕ್ತದೊತ್ತಡ (BP), ಮಧುಮೇಹ ಹಾಗೂ ಹೃದಯ ಸಂಬಂಧಿ ಕಾಯಿಲೆಗಳು ಬರುವ ಅಪಾಯವಿರುತ್ತದೆ. ಮಾನಸಿಕ ಒತ್ತಡ ಹಾಗೂ ಖಿನ್ನತೆಗೂ ಇದು ಕಾರಣವಾಗಬಹುದು. ಆದ್ದರಿಂದ ಆರೋಗ್ಯಕರ ಜೀವನಶೈಲಿಗಾಗಿ ನಿಮ್ಮ ವಯಸ್ಸಿಗೆ ಸೂಚಿಸಿರುವಷ್ಟು ಸಮಯ ತಪ್ಪದೇ ನಿದ್ದೆ ಮಾಡಿ.
