ಬಿಸಿಲಿನ ಬೇಗೆಯಿಂದ ತಂಪನ್ನು ನೀಡುವ ಕಲ್ಲಂಗಡಿ ಹಣ್ಣು ಕೇವಲ ರುಚಿಗೆ ಮಾತ್ರವಲ್ಲ, ಆರೋಗ್ಯಕ್ಕೂ ಅತ್ಯುತ್ತಮ. ಸಾಮಾನ್ಯವಾಗಿ ನಾವು ಕಲ್ಲಂಗಡಿ ಹಣ್ಣನ್ನು ತಿಂದ ಬಳಿಕ ಅದರ ಬೀಜಗಳನ್ನು ನಿರುಪಯುಕ್ತ ಎಂದು ಕಸದ ಬುಟ್ಟಿಗೆ ಎಸೆಯುತ್ತೇವೆ. ಆದರೆ, ಈ ಸಣ್ಣ ಬೀಜಗಳ ಒಳಗೆ ಅಡಗಿರುವ ರಹಸ್ಯ ತಿಳಿದರೆ ನೀವು ಎಂದಿಗೂ ಇವುಗಳನ್ನು ಬಿಸಾಡುವುದಿಲ್ಲ! ಹೌದು, ಕಲ್ಲಂಗಡಿ ಬೀಜಗಳು ಪೋಷಕಾಂಶಗಳ ಅಕ್ಷಯ ಪಾತ್ರೆಯಾಗಿದ್ದು, ಆರೋಗ್ಯದ ದೃಷ್ಟಿಯಿಂದ ಇದು ಪ್ರಮುಖ ಸೂಪರ್‌ಫುಡ್‌ ಆಗಿದೆ.
ಅಪಾರ ಪೋಷಕಾಂಶಗಳ ಭಂಡಾರ
ಆಹಾರ ತಜ್ಞರ ಪ್ರಕಾರ, 100 ಗ್ರಾಂ ಕಲ್ಲಂಗಡಿ ಬೀಜಗಳಲ್ಲಿ ಸುಮಾರು 34 ಗ್ರಾಂ ಪ್ರೋಟೀನ್ ಹಾಗೂ ಬರೋಬ್ಬರಿ 628 ಕ್ಯಾಲೊರಿಗಳಷ್ಟು ಶಕ್ತಿ ಅಡಗಿದೆ. ಇದು ದೇಹಕ್ಕೆ ತಕ್ಷಣದ ಚೈತನ್ಯವನ್ನು ನೀಡುವುದಲ್ಲದೆ, ದೈಹಿಕ ದೃಢತೆಯನ್ನು ಕಾಪಾಡಲು ಸಹಕರಿಸುತ್ತದೆ.
ಜಿಮ್ ಮಾಡುವವರು ಹಾಗೂ ಕ್ರೀಡಾಪಟುಗಳಿಗೆ ವರ
- ಸ್ನಾಯುಗಳ ಬೆಳವಣಿಗೆಗೆ ಬೆಂಬಲ: ಸಸ್ಯಾಹಾರಿಗಳು, ಕ್ರೀಡಾಪಟುಗಳು ಮತ್ತು ಪ್ರತಿದಿನ ಜಿಮ್‌ನಲ್ಲಿ ಕಸರತ್ತು ಮಾಡುವವರಿಗೆ ಇದು ಅತ್ಯುತ್ತಮ ನೈಸರ್ಗಿಕ ಆಹಾರವಾಗಿದೆ. ಇದರಲ್ಲಿರುವ ಅಧಿಕ ಮಟ್ಟದ ಪ್ರೋಟೀನ್ ಸ್ನಾಯುಗಳ ದುರಸ್ತಿಗೆ ಮತ್ತು ಬಲವರ್ಧನೆಗೆ ಸಹಾಯ ಮಾಡುತ್ತದೆ.
- ಶಕ್ತಿಯ ಮೂಲ: ಹೆಚ್ಚಿನ ಕ್ಯಾಲೊರಿ ಹಾಗೂ ಪೌಷ್ಟಿಕಾಂಶಗಳು ಇರುವುದರಿಂದ ದೈಹಿಕ ಶ್ರಮ ಹೆಚ್ಚಿರುವವರಿಗೆ ಇದು ಉತ್ತಮ ಸ್ಟೆಮಿನಾ ನೀಡುತ್ತದೆ.
ಸೇವಿಸುವ ಸರಿಯಾದ ವಿಧಾನ
ಕಲ್ಲಂಗಡಿ ಬೀಜಗಳನ್ನು ನೇರವಾಗಿ ತಿನ್ನುವುದಕ್ಕಿಂತ, ಅವುಗಳನ್ನು ನೀರಿನಲ್ಲಿ ನೆನೆಸಿ ಅಥವಾ ಲಘುವಾಗಿ ಹುರಿದು (Roasted) ಮಿತವಾಗಿ ಸೇವಿಸುವುದು ಹೆಚ್ಚು ಪ್ರಯೋಜನಕಾರಿ. ಇದು ಜೀರ್ಣಕ್ರಿಯೆಯನ್ನು ಸುಲಭಗೊಳಿಸುವುದಲ್ಲದೆ, ದೇಹಕ್ಕೆ ಪೋಷಕಾಂಶಗಳು ಸಂಪೂರ್ಣವಾಗಿ ಸಿಗುವಂತೆ ಮಾಡುತ್ತದೆ.
ಇನ್ನುಮುಂದೆ ಕಲ್ಲಂಗಡಿ ಹಣ್ಣು ತಿಂದಾಗ ಬೀಜಗಳನ್ನು ಎಸೆಯುವ ಬದಲು, ಒಣಗಿಸಿ ಹುರಿದಿಟ್ಟುಕೊಂಡು ನಿಮ್ಮ ದೈನಂದಿನ ಆಹಾರ ಕ್ರಮದಲ್ಲಿ ಮಿತವಾಗಿ ಬಳಸಿ ಹಾಗೂ ಆರೋಗ್ಯಕರ ಜೀವನಶೈಲಿಯನ್ನು ರೂಢಿಸಿಕೊಳ್ಳಿ!
