ಜೇನುತುಪ್ಪವನ್ನು ನೈಸರ್ಗಿಕ ಸಿಹಿಕಾರಕ ಹಾಗೂ ಔಷಧೀಯ ಗುಣಗಳುಳ್ಳ ಅಮೂಲ್ಯ ಆಹಾರವೆಂದು ಪರಿಗಣಿಸಲಾಗಿದೆ. ಬಿಳಿ ಸಕ್ಕರೆಗೆ ಆರೋಗ್ಯಕರ ಪರ್ಯಾಯವಾಗಿ ಅನೇಕರು ಇದನ್ನು ಪ್ರತಿದಿನದ ಆಹಾರ ಕ್ರಮದಲ್ಲಿ ಬಳಸುತ್ತಾರೆ. ಆದರೆ, ಯಾವುದೇ ಉತ್ತಮ ಪದಾರ್ಥವಿದ್ದರೂ ಅದನ್ನು ಅತಿಯಾಗಿ ಸೇವಿಸುವುದರಿಂದ ವ್ಯತಿರಿಕ್ತ ಪರಿಣಾಮಗಳು ಉಂಟಾಗುತ್ತವೆ. ಜೇನುತುಪ್ಪದಲ್ಲಿ ಗ್ಲೂಕೋಸ್ ಮತ್ತು ಫ್ರಕ್ಟೋಸ್‌ನಂತಹ ಸಕ್ಕರೆ ಅಂಶಗಳು ಹಾಗೂ ಕ್ಯಾಲೊರಿಗಳು ಅಧಿಕವಾಗಿದ್ದು, ಇದರ ಅತಿಯಾದ ಬಳಕೆಯು ದೇಹದ ಮೇಲೆ ನಕಾರಾತ್ಮಕ ಪ್ರಭಾವ ಬೀರುತ್ತದೆ.
ಜೇನುತುಪ್ಪದ ಅತಿಯಾದ ಸೇವನೆಯಿಂದ ಉಂಟಾಗುವ ಪ್ರಮುಖ ಅಪಾಯಗಳು:
-
ರಕ್ತದಲ್ಲಿನ ಸಕ್ಕರೆ ಮಟ್ಟ ಹೆಚ್ಚಳ: ಜೇನುತುಪ್ಪದಲ್ಲಿ ಕಾರ್ಬೋಹೈಡ್ರೇಟ್ ಮತ್ತು ಸಕ್ಕರೆ ಅಂಶಗಳು ಹೆಚ್ಚಿನ ಪ್ರಮಾಣದಲ್ಲಿ ಇರುತ್ತವೆ. ಇದನ್ನು ಮಿತಿಯಿಲ್ಲದೆ ಸೇವಿಸುವುದರಿಂದ ರಕ್ತದಲ್ಲಿನ ಸಕ್ಕರೆ ಮಟ್ಟ (Blood Sugar Levels) ಹಠಾತ್ ಏರಿಕೆಯಾಗಿ, ಮಧುಮೇಹಿಗಳಿಗೆ ತೀವ್ರತರವಾದ ಅಪಾಯವನ್ನುಂಟುಮಾಡುತ್ತದೆ.
-
ತೂಕ ಹೆಚ್ಚಾಗಲು ಕಾರಣ: ಸಕ್ಕರೆಗೆ ಬದಲಾಗಿ ಬಳಸುತ್ತಿದ್ದೇವೆ ಎಂಬ ಕಾರಣಕ್ಕೆ ಅಳತೆಯಿಲ್ಲದೆ ಜೇನುತುಪ್ಪ ತಿಂದರೆ ತೂಕ ಇಳಿಯುವ ಬದಲು ಹೆಚ್ಚಾಗುತ್ತದೆ. ಇದರಲ್ಲಿರುವ ಅಧಿಕ ಕ್ಯಾಲೊರಿಗಳು ತೂಕ ನಷ್ಟದ ಪ್ರಯತ್ನಕ್ಕೆ ಹಿನ್ನಡೆ ಉಂಟುಮಾಡುತ್ತವೆ.
-
ಹಲ್ಲುಗಳ ಹುಳುಕು (ದಂತ ಸಮಸ್ಯೆಗಳು): ಜೇನುತುಪ್ಪದಲ್ಲಿ ಸುಮಾರು ಶೇಕಡಾ 82ರಷ್ಟು ಸಕ್ಕರೆ ಅಂಶವಿರುತ್ತದೆ. ಇದು ಹಲ್ಲುಗಳಿಗೆ ಅಂಟಿಕೊಳ್ಳುವುದರಿಂದ ದಂತಕುಳಿಗಳು (Dental Cavities) ಮತ್ತು ಹಲ್ಲುಗಳ ಹುಳುಕಿನ ಸಮಸ್ಯೆ ಉಂಟಾಗುವ ಸಾಧ್ಯತೆ ಹೆಚ್ಚು.
-
ಜೀರ್ಣಕ್ರಿಯೆ ಸಮಸ್ಯೆಗಳು: ಜೇನುತುಪ್ಪದಲ್ಲಿರುವ ಅಧಿಕ ಫ್ರಕ್ಟೋಸ್ ಅಂಶವು ಕೆಲವರಲ್ಲಿ ಜೀರ್ಣಾಂಗ ವ್ಯವಸ್ಥೆಯ ಮೇಲೆ ಪರಿಣಾಮ ಬೀರುತ್ತದೆ. ಇದು ಹೊಟ್ಟೆ ಉಬ್ಬರ, ಮಲಬದ್ಧತೆ ಅಥವಾ ಅತಿಸಾರದಂತಹ (Diarrhea) ತೊಂದರೆಗಳಿಗೆ ಕಾರಣವಾಗಬಹುದು.
-
ಅಲರ್ಜಿ ಹಾಗೂ ಶಿಶುಗಳಿಗೆ ಅಪಾಯ: ಸೂಕ್ಷ್ಮ ಮೈತೂಕವಿರುವವರಲ್ಲಿ ಜೇನುತುಪ್ಪ ಅಲರ್ಜಿಯನ್ನು (ಉಸಿರಾಟದ ತೊಂದರೆ ಅಥವಾ ತುಟಿಗಳ ಊತ) ಉಂಟುಮಾಡಬಹುದು. ಮುಖ್ಯವಾಗಿ, ಒಂದು ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಶಿಶುಗಳಿಗೆ ಜೇನುತುಪ್ಪವನ್ನು ನೀಡುವುದು ಅತ್ಯಂತ ಅಪಾಯಕಾರಿ, ಏಕೆಂದರೆ ಇದು ‘ಬೊಟುಲಿಸಮ್’ ಎಂಬ ಗಂಭೀರ ಸ್ವರೂಪದ ಕಾಯಿಲೆಗೆ ಕಾರಣವಾಗಬಹುದು.
ಯಾರು ಎಚ್ಚರಿಕೆ ವಹಿಸಬೇಕು?
-
ಮಧುಮೇಹಿಗಳು ಮತ್ತು ತೂಕ ಇಳಿಸಿಕೊಳ್ಳಲು ಬಯಸುವವರು ಜೇನುತುಪ್ಪವನ್ನು ಕಟ್ಟುನಿಟ್ಟಾದ ಮಿತಿಯಲ್ಲಿ ಬಳಸಬೇಕು.
-
ಇದನ್ನು ಔಷಧಿಯಂತೆ ಅಥವಾ ರುೆಗಾಗಿ ಮಿತವಾಗಿ ಬಳಸುವುದೇ ಉತ್ತಮವೇ ಹೊರತು, ಅತಿಯಾಗಿ ಸೇವಿಸುವುದು ಆರೋಗ್ಯಕ್ಕೆ ಹಾನಿಕರ. ಸಮತೋಲಿತ ಆಹಾರ ಮತ್ತು ಉತ್ತಮ ಜೀವನಶೈಲಿಯೊಂದಿಗೆ ಇದನ್ನು ಸೀಮಿತ ಪ್ರಮಾಣದಲ್ಲಿ ಬಳಸುವುದು ಒಳಿತು.
