ಇತ್ತೀಚಿನ ದಿನಗಳಲ್ಲಿ ಗಂಟೆಗಟ್ಟಲೆ ಒಂದೇ ಕಡೆ ಕುಳಿತು ಕೆಲಸ ಮಾಡುವುದರಿಂದ ಕುತ್ತಿಗೆ ನೋವು ಸಾಮಾನ್ಯ ಸಮಸ್ಯೆಯಾಗಿದೆ. ನಮ್ಮ ದೈನಂದಿನ ಕೆಲವು ತಪ್ಪು ಅಭ್ಯಾಸಗಳೇ ಈ ಸಮಸ್ಯೆಗೆ ಪ್ರಮುಖ ಕಾರಣ. ಕುತ್ತಿಗೆಯನ್ನು ಸರಿಯಾದ ಭಂಗಿಯಲ್ಲಿ ಇಟ್ಟುಕೊಳ್ಳದಿರುವುದು, ತಪ್ಪು ರೀತಿಯಲ್ಲಿ ಮಲಗುವುದು ಮತ್ತು ದೈಹಿಕ ಶ್ರಮವಿಲ್ಲದಿರುವುದು ನೋವನ್ನು ಮತ್ತಷ್ಟು ಹೆಚ್ಚಿಸುತ್ತದೆ. ಈ ಸಮಸ್ಯೆಯಿಂದ ಸುಲಭವಾಗಿ ಹೊರಬರಲು ನಿಮ್ಮ ಜೀವನಶೈಲಿಯಲ್ಲಿ ಈ ಸಣ್ಣ ಬದಲಾವಣೆಗಳನ್ನು ಮಾಡಿಕೊಳ್ಳಿ.
ಕುತ್ತಿಗೆ ನೋವು ನಿವಾರಣೆಗೆ ಪ್ರಮುಖ ಸಲಹೆಗಳು
-
ಸರಿಯಾದ ಭಂಗಿಯಲ್ಲಿ ಕುಳಿತುಕೊಳ್ಳಿ: ಕೆಲಸ ಮಾಡುವಾಗ ಬೆನ್ನು ಮತ್ತು ಕುತ್ತಿಗೆಯನ್ನು ಯಾವಾಗಲೂ ನೇರವಾಗಿರಿಸಿ. ಕಂಪ್ಯೂಟರ್ ಅಥವಾ ಲ್ಯಾಪ್‌ಟಾಪ್ ಪರದೆ ನಿಮ್ಮ ಕಣ್ಣಿನ ನೇರಕ್ಕೆ (Eye level) ಇರುವಂತೆ ನೋಡಿಕೊಳ್ಳಿ.
-
ಎತ್ತರದ ದಿಂಬುಗಳ ಬಳಕೆ ಬೇಡ: ಮಲಗುವಾಗ ಅತಿಯಾದ ಅಥವಾ ಎತ್ತರದ ದಿಂಬುಗಳನ್ನು ಬಳಸಬೇಡಿ. ಇದು ಕುತ್ತಿಗೆಯ ನರಗಳ ಮೇಲೆ ಒತ್ತಡ ಹೇರಿ, ಕುತ್ತಿಗೆ ಮತ್ತು ಬೆನ್ನು ನೋವಿಗೂ ಕಾರಣವಾಗುತ್ತದೆ.
-
ವಿಶ್ರಾಂತಿ ಮತ್ತು ಚಲನೆ ಅಗತ್ಯ: ಸತತವಾಗಿ ಕುಳಿತುಕೊಳ್ಳಬೇಡಿ. ಪ್ರತಿ ಎರಡು ಗಂಟೆಗೊಮ್ಮೆ ಎದ್ದು ಕನಿಷ್ಠ 5 ನಿಮಿಷಗಳ ಕಾಲ ಓಡಾಡಿ ಅಥವಾ ಸಣ್ಣಪುಟ್ಟ ಕುತ್ತಿಗೆಯ ವ್ಯಾಯಾಮಗಳನ್ನು (Stretching) ಮಾಡಿ.
-
ಭಾರ ಎತ್ತುವುದನ್ನು ತಪ್ಪಿಸಿ: ಕುತ್ತಿಗೆ ಅಥವಾ ಬೆನ್ನಿನ ಮೇಲೆ ನೇರವಾಗಿ ಒತ್ತಡ ಬೀಳುವಂತಹ ಭಾರವಾದ ವಸ್ತುಗಳನ್ನು ಎತ್ತುವುದನ್ನು ಆದಷ್ಟು ಕಡಿಮೆ ಮಾಡಿ.
-
ದೈನಂದಿನ ವ್ಯಾಯಾಮ ಮತ್ತು ನಿದ್ರೆ: ಪ್ರತಿದಿನ ಕನಿಷ್ಠ ಒಂದು ಗಂಟೆ ದೈಹಿಕ ವ್ಯಾಯಾಮ ಮಾಡುವುದನ್ನು ರೂಢಿಸಿಕೊಳ್ಳಿ. ಜೊತೆಗೆ ಸಾಕಷ್ಟು ವಿಶ್ರಾಂತಿ ಹಾಗೂ ದಿನಕ್ಕೆ 7-8 ಗಂಟೆಗಳ ಕಾಲ ನೆಮ್ಮದಿಯ ನಿದ್ರೆ ಮಾಡುವುದರಿಂದ ಸ್ನಾಯುಗಳು ಬೇಗನೆ ಚೇತರಿಸಿಕೊಳ್ಳುತ್ತವೆ.
